Зәйлеләр махсус хәрби операциядә катнашучылар белән хушлашты
Бүген зәйлеләр махсус хәрби операция зонасында хәрби бурычларны үтәгәндә һәлак булган якташлары - Исмәгыйлев Әнәс Әхмәтулла улын һәм Чурбанов Денис Андреевичны соңгы юлга озаттылар. Матәм чарасы «Энергетик» мәдәният йортында узды. Район башлыгы Разиф Кәримов солдатларның туганнарына, якыннарына, барлык зәйлеләргә Татарстан Республикасы Рәисе, шәхсән үз исеменнән һәм барлык зәйлеләргә кайгы уртаклашу сүзләре белән мөрәҗәгать итте. "Без барыбыз да сезнең белән бергә кайгырабыз. Без Денис Андреевич һәм Әнәс Әхмәтулла улы белән горурланабыз һәм алар турында якты истәлек йөрәкләребездә озак сакланыр - диде Разиф Галиевич. Шулай ук Зәй шәһәре һәм Зәй районы хәрби комиссары А.Ф. Әгъләмҗанов та кайгы уртаклашты. Бер минут тынлык белән солдатларны искә алдылар. Хәрбиләрне соңгы юлга барлык хәрби хөрмәтләр белән озаттылар. Исмәгыйлев Әнәс Әхмәтулла улын Югары Пәнәче авылы зиратына, Чурбанов Денис Андреевичны Якты Күл авылы зиратына җирләделәр.