Элеккеге тоткын Галина Попова "Бердәм Россия" партиясеннән килгән кунакларны каршы алды

"Хәтерләгәнегез өчен рәхмәт"-диде элеккеге тоткын Галина Попова "Бердәм Россия" партиясеннән килгән кунакларны каршы алып. Аңа Фашистлар әсирлегенә эләккәндә нибары 10 яшь булган. Бөек Җиңү алдыннан Зәй бердәмроссиялеләренең ветераннарны, тыл хезмәтчәннәрен, шулай ук сугыш чоры балаларын килеп котлый торган гадәтләре бар. Район Советында партия фракциясе җитәкчесе, район башлыгы урынбасары Петр Уразайкин һәм «Бердәм Россия»нең җирле бүлекчәсе башкарма сәркатибе Петр Тимаськов балачагы Бөек Ватан сугышының авыр елларына туры килгән Галина Попова янына бардылар. Кече абыйсы, сеңлесе һәм әбисе белән бергә 1941 елда ул Карелия территориясендәге концлагерьга эләгә, анда аларга коточкыч сынаулар кичерергә туры килә. Балаларны конвой астында слюда фабрикасына эшкә йөрткәннәр. Анда Галина Григорьевна ишетү сәләтен өлешчә югалта. 1944 елда Петрозаводскта совет гаскәрләре әсирләрне азат итә. Гаилә Подпорожьега – Ленинград өлкәсендәге шәһәргә кайта. 16 яшендә Галина гидроэлектромонтажда монтажчы булып эшли башлый. Шушы предприятиедә һәм бу белгечлек буенча гомер буе хезмәт куя. Илнең зур һәм кечкенә төзелешләрендә була. Һөнәри язмышы аны ире белән Зәйгә алып килә, анда Зәй ГРЭСын, аннары башка шәһәр предприятиеләрен төзүдә актив катнаша. Галина Григорьевнаның өч баласы, оныклары Һәм оныкчыклары күп. Сәламәтлеге начар булуга һәм күрү сәләтен югалтуга карамастан, ул күңел күтәренкелеген югалтмый, кунакларны рәхәтләнеп кабул итә, үз тормышы турында сөйли. Җиңү көне алдыннан Галина Григорьевнага «Бердәм Россия» дән истәлекле бүләк тапшырдылар һәм ныклыгы һәм батырлыгы өчен тирән рәхмәт белдерделәр. "Мондый очрашулар-игътибар билгесе генә түгел, ә сугышны кичергән буын алдындагы бурычыбыз да. Без сезнең батырлыгыгызны һәрвакыт истә тотачакбыз", - диде Петр Уразайкин. Галина Григорьевна җитәкчеләрнең аны кайгыртуы өчен рәхмәт белдерде. "Безне, ветераннарны һәм тоткыннарны онытмавыгыз өчен рәхмәт. Безнең өчен бу бик мөһим», — диде ул кунакларны озатып.