Район башлыгы авыл хуҗалыгы бүлекчәләрендәге эш барышын карады

Бүген район башлыгы Р.Г. Кәримов авыл хуҗалыгы идарәсе, Россельхозүзәк һәм агрофирмалар белгечләре белән чираттагы мәртәбә авыл хуҗалыгы бүлекчәләрендәге эш барышын карады. Районда бар куәткә язгы кыр эшләре бара. Бөртекле культуралар чәчү төгәлләнеп килә. Бүген район игенчеләре шикәр чөгендере, көнбагыш, рапс, горчица чәчәләр. Язгы бодайның беренче чәчүлекләре шытып чыкты. Көзге культураларны тамырдан тукландыру төгәлләнде. Механизаторлар язгы бодайны тамырдан тукландыруга керештеләр. Параллель рәвештә чүп үләннәренә, авыруларга каршы көрәш һәм көзге бодайның яфракларын тукландыру эшләре бара. Район башлыгы һәм комиссия әгъзалары башкарылган эшләрнең сыйфатыннан канәгать калдылар. Разиф Галиевич механизаторларны якынлашып килүче бәйрәм - Бөек Ватан сугышында Җиңүнең 80 еллыгы белән котлады, аларга ныклы сәламәтлек, эшләрендә уңышлар һәм тыныч күк йөзе теләде. Шулай ук механизаторларга бәйрәм уңаеннан георгий тасмалары тапшырылды. Район башлыгы язгы кыр эшләрен 10 көн эчендә төгәлләү бурычын куйды.