Зәйдә махсус хәрби операциядә катнашкан С.А. Носовны соңгы юлга озаттылар

Бүген зәйлеләр махсус хәрби операциядә катнашканда һәлак булган рядовой Носов Сергей Анатольевичны соңгы юлга озаттылар. Матәм чарасы «Энергетик» мәдәният йортында узды. Район башлыгы Разиф Кәримов хәрби хезмәткәрнең туганнары һәм якыннарына, барлык зәйлеләргә, Татарстан Республикасы Рәисе, шәхсән үз исеменнән кайгы уртаклашу сүзләре белән мөрәҗәгать итте. "Бүген без якташыбыз Носов Сергей Анатольевич белән саубуллашабыз, ул Россия Федерациясе Оборона министрлыгы белән килешү төзеп, Ватанны саклаучылар сафына басты һәм соңгы сулышына кадәр чын ир-ат принципларына тугры калды. Сергей Анатольевич хәрби бурычын лаеклы үтәде, туган ил чикләрен саклауга үз өлешен кертте. Кайтарып булмаслык югалту сәбәпле кайгы уртаклашу сүзләрен кабул итегез. Сугышчы тыныч йокласын", - диде Разиф Галиевич. Шулай ук кайгы уртаклашу сүзләре белән җиденче чакырылыш Татарстан Республикасы Дәүләт Советы депутаты Рияз Комаров, Зәй шәһәре һәм Зәй районы хәрби комиссары Айрат Әгъләмҗанов чыгыш ясады. Солдатны бер минут тынлык белән искә алдылар. Сергей Носовны соңгы юлга барлык хәрби хөрмәтләр белән озаттылар. Хәрби хезмәткәрне Александр Бистәсе авылы зиратына җирлиләр. Ватанны саклаучының истәлеге зәйлеләр күңелендә озак яшәр.