«Һәр сыерчыкка- оя!»

"Халыкара кошлар көне" — интернациональ экологик бәйрәм. Ул ел саен 1 апрельдә билгеләп үтелә. Россия Федерациясендә бәйрәмнәрнең иң танылганы санала. Бу көн очраклы сайланмаган, ул кошларның көньяктан туган якларына кайту чорына бәйле. Канатлы кошлар өйләренә март ахырында-апрель башында кайталар. Кошлар элек-электән кешенең игътибарын җәлеп иткәннәр. Кешеләрне аларның якты каурыйлары, гаҗәеп хәрәкәтләре, кыю, тиз очулары, моңлы сайраулары һәм, әлбәттә, серле яшәү рәвеше сокландыра. Апрельнең беренче атнасында шәһәрнең 2 нче мәктәбендә оештырылган «Һәр сыерчыкка- оя!» экологик акциясе нәкъ менә шушы датага багышланган иде. Кыш көне үк 1-4 нче сыйныф коллективларына матур сыерчык оялары ясау йөкләнгән. Укучылар, ата-аналар, сыйныф җитәкчеләре аларны әзерләүдә актив катнаштылар. Өлкән сыйныф укучылары мәктәп территориясендә сыерчык оялары элделәр. Бу акция бик мөһим, чөнки ул канатлы дусларыбызны законсыз аулау, кайберләренең акрынлап кимү һәм аерым төрләренең юкка чыгу проблемаларына багышланган. Кошларның экологик әһәмияте бик мөһим. Аларның юкка чыгуы чын табигать һәлакәтенә китерергә мөмкин. Шуңа күрә бу акция канатлы дусларыбызның мөһимлеген искә төшерергә ярдәм итәргә тиеш.