Зәйдә махсус хәрби операциядә катнашучылар белән хушлаштылар
Бүген зәйлеләр махсус хәрби операция вакытында һәлак булган хәрбиләрне - кече лейтенант Юнысов Айдар Равис улын һәм рядовой Гомәров Марат Радик улын соңгы юлга озаттылар. Матәм чарасы «Энергетик»мәдәният йортында узды. Район башлыгы Разиф Кәримов һәлак булганнарның туганнары һәм якыннарына, барлык зәйлеләргә кайгы уртаклашу сүзләре белән мөрәҗәгать итте. «Сезнең кайгы - хәсрәтегезне киметә алырлык сүзләр юк, сез улларыгызны сугыш кырында югалттыгыз. Авыр югалту сәбәпле, кайгыгызны уртаклашу сүзләрен ихлас күңелдән кабул итегез. Сезнең улларыгыз-Айдар Равис улы һәм Марат Радик улы зәйлеләр күңелендә чын патриотизм һәм батырлык үрнәге булып яшәр. Безнең уртак бурычыбыз - Ватан азатлыгы хакына һәлак булганнарның барысын да туган җиргә кайтару, чын геройларның якты истәлекләрен саклап калу. Авыр туфраклары җиңел булсын, сугышчылар тыныч йокласын", - диде Разиф Галиевич. Шулай ук кайгы уртаклашу сүзләре белән җиденче чакырылыш Татарстан Республикасы Дәүләт Советы депутаты Рияз Комаров, Зәй шәһәре һәм Зәй районы хәрби комиссары А.Ф. Әгъләмҗанов чыгыш ясадылар. Солдатларны бер минут тынлык белән искә алдылар. Айдар Юнысов белән Марат Гомәровны соңгы юлга барлык хәрби тәртипләрне саклап озаттылар. Солдатларны Яңа шәһәр микрорайоны зиратына җирләделәр. Ватанны саклаучылар истәлеге зәйлеләрнең йөрәгендә озак яшәр!