Район мөселманнары Ураза гаетен билгеләп үтәләр

Бүген дөньяның бар мөселманнары изге Рамазан бәйрәме- ураза тәмамлануын билгеләп үтәләр. Шәһәрнең һәм районның барлык мәчетләрендә бәйрәм уңаеннан тантаналар узды. Таңнан торып, йөзләгән кеше Т. Ялчыгол исемендәге Үзәк шәһәр мәчетенә бәйрәм намазына җыелды. Иртәнге намаздан соң монда Коръән аятьләре укый башладылар, вәгазьләр сөйләделәр. Районның имам-мөхтәсибе Фатих хәзрәт Нуруллин Рамазан аеның игелеге турында искә төшерде, дин кардәшләренә Татарстан мөфтие Камил хәзрәт Сәмигуллин исеменнән котлау сүзләрен җиткерде. Бәйрәм шатлыгын уртаклашырга район башлыгы Р.Г. Кәримов та килде. Разиф Гали улы чарада катнашучыларны бәйрәм белән котлап, район мөселманнарының киләчәктә дә толерантлык үрнәге булып хезмәт итәчәгенә, милләтара һәм конфессияара татулыкны, туган районның һәм республиканың үсешенә үз өлешләрен кертәчәгенә ышануын ассызыклады. Шулай ук район башлыгы барлык зәйлеләргә махсус хәрби операциядә катнашучыларга армый-талмый ярдәм иткәннәре, ил өчен авыр вакытта берләшә белүләре өчен рәхмәт белдерде. Бәйрәм намазы тантананың иң югары мизгеле булды. Мәчеткә килгән барлык дин тотучыларны мәчет мәйданчыгында әзерләнгән тәмле плау белән сыйладылар. Мәчеттә булганнан соң, мөселманнар бәйрәмне гаиләләре арасында билгеләп үтү өчен өйләренә таралыштылар. Шулай ук Гает көнне зиратларга бару традициясе яши. Ир-атлар якыннары, туганнары каберенә барып, әрвахлар рухына дога кылалар, Коръән аятьләре укыйлар.