Зәйдә мәдәният хезмәткәрләрен хөрмәтләделәр

Бүген Зәй балалар музыка мәктәбендә Мәдәният хезмәткәрләре көненә багышланган тантаналы чара узды. Бу - көн саен кешеләргә шатлык һәм яхшы кәеф бүләк итүчеләр, үзләренең фидакарь хезмәтләре, бетмәс-төкәнмәс илһамлары һәм сәнгатькә тугры хезмәт итүләре белән тормышыбызның теләсә кайсы көнен онытылмаслык тәэсирләр белән тулыландыручылар бәйрәме. Җылы тәбрикләү сүзләре белән мәдәният хезмәткәрләре алдында район башлыгы Р.Г. Кәримов чыгыш ясады. Ул тармак вәкилләренең махсус хәрби операциядә катнашучыларга гуманитар ярдәм җыюны оештыру һәм маскировка челтәрләре үрү, башка кирәк- яраклар җитештерүгә керткән өлешләренә аерым тукталды, мәдәният хезмәткәрләренә тырыш хезмәтләре, битараф булмаулары өчен рәхмәт белдерде. Бәйрәмдә мәдәният өлкәсендә иң талантлы һәм хезмәт сөючән хезмәткәрләрне бүләкләделәр. Хезмәт алдынгыларына Татарстан Республикасы Мәдәният министрлыгы, Зәй муниципаль районы башлыгының Мактау грамоталары, Зәй муниципаль районы Башкарма комитеты җитәкчесенең Рәхмәт хатлары тапшырылды. "Азаль" вокаль-хореография ансамбле, "Позитив" балалар музыка мәктәбе укытучылары ансамбле, "Алтын Барс", «Болгар милли музыкасы» премияләре лауреаты автор-башкаручы Риназ Әхмәтов чыгышы бәйрәм бизәкләре булды һәм үзенчәлекле ямь өстәде.