Зәй районында тыл хезмәтчәнен хөрмәтләделәр

Бу көннәрдә районыбызның Зичәбаш авылында яшәүче тыл ветераны Раиса Кузнецова үзенең 95 яшьлек юбилеен билгеләп үтте. Аны котларга район башлыгы урынбасары Петр Уразайкин, Дүрт-Мунча авыл җирлеге башлыгы Радик Ситдыйков, автоклуб хезмәткәрләре килде. Петр Сергеевич ветеранны Россия Президенты, район башлыгы исеменнән котлап, матур хезмәт һәм хөрмәтле гомер юлы узган ветеранга рәхмәтен, балалары, оныклары кочагында һәм тәрбиясендә матур гомер итүенә соклануын белдерде. Раиса апаның да балачагы, үсмер вакытлары бик авыр вакытларга туры килгән. Ул чор кешеләре барысы да тормышның авыр, михнәтле чорын күргән буын һәм инде бик күпләргә гыйбрәт итеп сөйләрлек үткәннәре бар. Сугыш чоры баласы буларак, яшьтәшләре кебек ул да хезмәт юлын колхозда эшләп башлый. 95 яшендә дә әле ил-көн яңалыклары белән танышып бара, җырлар да җырлый, шигырьләр дә укый. Бүгенге тормышының ипле генә баруына куанып гомер кичерүче Раиса әби үзен котларга килүчеләргә зур рәхмәтләрен житкерде, ил-көннәребезнең тыныч булын теләде.