Халыкара хатын –кызлар көненә багышланган “Күңелле стартлар”

4 мартта “Старт” спорт-сәламәтләндерү комплексында Халыкара хатын-кызлар көненә багышланган “Күңелле стартлар” дип исемләнгән спорт чарасы узды. Чара Татарстан Республикасында 2025-2030 елларга «Актив озак яшәү» программасын гамәлгә ашыру кысаларында узды. Актив пенсионерлар командалары эстафеталарда тизлеккә, җитезлеккә һәм төгәллеккә ярыштылар. Тормышны яратучан һәм актив катнашучылар барлык каршылыкларны да җиңел үтәделәр, чөнки аларның күбесе даими рәвештә дәвалау гимнастикасы дәресләренә йөри, физкультура, скандинавия йөреше, йөзү белән шөгыльләнә. Дуслык җиңде! Күңелле стартларда катнашучыларның барысы да татлы призлар белән бүләкләнде, ә иң мөһиме -күтәренке рух һәм күтәренке кәеф алды! Эстафетаны “Барс” спорт мәктәбе тренер-укытучысы Абдуллина Гөлназ Ризаттиновна уздырды.