Зәй укучылары яңа технологияләр үзләштерә

Гомуми белем бирүнең заманча системасы үсеп килүче буында җәмгыятьтә ихтыяҗ булган төп компетентлыкларны формалаштыруга юнәлдерелгән. Укыту һәм тәрбия бирү сыйфаты, чыгарылыш укучысының заманча хезмәт базарында уңышлылыгы һәм конкурентлыкка сәләте аның үсеш дәрәҗәсенә бәйле. Россия Федерациясе Президентының 07.05.2024 №309 «Россия Федерациясенең 2030 елга кадәр һәм перспективада 2036 елга кадәр үсешенең милли максатлары турында» Указы кысаларында 2025 елдан «Яшьләр һәм балалар» милли проекты гамәлгә ашырыла. Зәй шәһәренең «Аерым предметларны тирәнтен өйрәнүче 7 нче урта гомуми белем бирү мәктәбе» базасында «Үсеш ноктасы» табигый-фәнни һәм технологик юнәлешләр үзәге эшли. Укучыларның химия, биология һәм физика буенча заманча цифрлы җиһазларны кулланып, яңа технологияләрне үзләштерү мөмкинлеге барлыкка килде. Балаларга лаборатория җиһазларын «Эко стилендәге тормыш», «Фән мәктәп укучылары», «Экология - һәркемнең эше» конференцияләренә, тикшеренү проектларына әзерләнгәндә куллану бик ошый. Лаборатор биологик-химик анализ ярдәмендә укучылар суның катылыгын, атмосфера һавасында углерод әчемәсе микъдарын тикшерәләр. «Физик йөкләнешләрнең тән температурасына тәэсире», «Төрле матдәләрдә PH күрсәткечләрен билгеләү», «Сыйныфларда һава тирәлеге температурасын билгеләү» һ. б. төрле темаларга проектлар башкаралар. Яшь тикшеренүчеләр олимпиадаларының практик өлешенә әзерлек өстендә актив эшлиләр. «Z.LABS» лаборатор җиһазлары ярдәмендә укучылар сулыш алу ешлыгын һәм физик йөкләнешне билгеләү, ЭКГ буенча вегетатив нерв системасының эшен бәяләү, пульс дулкыны таралуның уртача тизлеген билгеләү күнекмәләрен өйрәнәләр. Практик күнекмәләрне камилләштерү бөтенроссия олимпиадаларының республика этабында уңышлы чыгыш ясарга һәм призлы урыннар алырга мөмкинлек бирә. Призерларның һәм җиңүчеләрнең дипломнары профильле югары уку йортларына кергәндә югары стипендия алу мөмкинлеге бирә. Мәктәп директоры И.А. Биканов билгеләп үткәнчә, милли проектлар укучыларның интеллектуаль һәм иҗади сәләтләрен үстерүдә ярдәм итә, укучыларга күбрәк мөмкинлекләр ача, димәк, белем бирү процессының нәтиҗәлелеген арттыра.