Зәйдә М.В. Данилов истәлегенә ирекле көрәш буенча Республика турниры уза

Бүген «Старт» спорт-сәламәтләндерү комплексында Михаил Владимирович Данилов истәлегенә багышланган ирекле көрәш буенча ачык республика турниры уза. «Зәй» спорт мәктәбенең ирекле көрәш бүлеге тренеры Михаил Данилов 2018 елның 26 августында вафат булды. 2019 елдан Зәйдә аны искә алу турниры уздыру күркәм традициягә әверелде. Михаил Владимирович спортчыларны яшәргә, теләсә нинди катлаулы хәлләрдән чыгу юлын табарга, яхшылыкка ышанырга, үз сәламәтлекләрен кайгыртырга өйрәтте. Турнирны ачу тантанасында катнашучыларны һәм кунакларны район башлыгы Р.Г. Кәримов исеменнән аның урынбасары П.С. Уразайкин сәламләде. Петр Сергеевич Михаил Даниловның районда спортны үстерүдәге һәм үсеп килүче буынны тәрбияләүдәге ролен билгеләп үтте, спортчыларга лаеклы һәм гадел көрәш теләде. Турнирда Чувашия, Удмуртия Республикаларыннан, Самара өлкәсеннән, Октябрьск, Сарапул, Ижевск, Оренбург, Пермь шәһәрләреннән, Әлмәт, Биектау, Түбән Кама, Мамадыш, Зәй муниципаль районнарыннан, Кама Аланы шәһәр тибындагы бистәсеннән, Яр Чаллы һәм Казан шәһәреннән 215 спортчы катнаша. Спортчылар 23 авырлык категориясендә көрәшәчәк.