Район башлыгы ТР төзелеш министрлыгы йомгаклау коллегиясендә катнашты

Бүген Галиәсгар Камал исемендәге театрның яңа бинасында Татарстан Республикасы төзелеш, архитектура һәм торак-коммуналь хуҗалык министрлыгының коллегиясе узды. Чарада катнашучылар 2024 елга йомгак ясадылар һәм 2025 елга бурычларны билгеләделәр. Чара Татарстан Республикасы Рәисе Рөстәм Миңнеханов, РФ төзелеш һәм торак-коммуналь хуҗалык министры Ирек Фәйзуллин һәм тармакның башка вәкилләре катнашында узды. Фикер алышуның төп темасы оператив чишелешләр таләп итә торган коммуналь инфраструктураны модернизацияләү булды. ТР Төзелеш, архитектура һәм торак-коммуналь хуҗалык министры Марат Айзатуллин ассызыклаганча, коммуналь челтәрләрнең тузуы җитди проблема булып кала. Аны бетерү өчен республикада «Коммуналь инфраструктураны модернизацияләү» федераль программасы гамәлгә ашырыла. Соңгы ике елда Татарстан 4,5 миллиард сум күләмендә финанслау алды, бу 128 чакрым җылылык, су үткәрү һәм канализация челтәрләрен яңартырга мөмкинлек бирде. Агымдагы елдан әлеге программа «Яшәү өчен инфраструктура» яңа милли проекты составына керде. Якындагы өч елга, федераль бюджет акчаларын һәм республика чыганакларын да кертеп, 8 миллиард 362 миллион сум күләмендә финанслау каралган. 2025 елга 3 миллиард 159 миллион сум бүлеп бирү планлаштырылган. Марат Айзатуллин шулай ук Татарстан Республикасы Рәисе тарафыннан мөһим карар кабул ителүе-торак – коммуналь инфраструктураны модернизацияләү буенча өстәмә озак сроклы республика программасы эшләтеп җибәрү турында хәбәр итте. Бу программаны финанслау күләме агымдагы елда 10 миллиард сум тәшкил итәчәк. Хәзерге вакытта аны формалаштыру эшләре төгәлләнеп килә. Зәй районы башлыгы Кәримов Разиф Гали улы әлеге чараларның торак-коммуналь хуҗалык өлкәсендәге хезмәтләрнең сыйфатын яхшырту һәм район халкы өчен уңайлы шартлар тудыру өчен мөһимлеген ассызыклады.