Зәйдә 2024 ел Уңыш бәйрәме узды
Бүген «Энергетик» мәдәният йортында 2024 елгы уңыш бәйрәме узды. Тантаналы чарада район башлыгы Разиф Кәримов, Татарстан Республикасы Авыл хуҗалыгы һәм азык-төлек министрының беренче урынбасары Ленар Гарипов, Россия Федерациясе Дәүләт Думасы депутаты Анатолий Иванов, Татарстан Республикасы Дәүләт Советы депутатлары Азат Хамаев, Рияз Комаров, Татарстан Республикасы Хөкүмәте кураторы Иван Гущин һәм башкалар катнашты һәм авыл хезмәтчәннәрен һөнәри бәйрәмнәре белән котладылар. Районның алдынгы авыл хуҗалыгы хезмәткәрләренә республика һәм район дәрәҗәсендәге төрле бүләкләр тапшырылды. Терлек азыгы әзерләү, шикәр чөгендерен җыю буенча җитәкчеләр дә, гади хезмәткәрләр – механизаторлар да, машина белән сыер саву операторлары һәм терлекчеләр, эшкәртү предприятиеләре хезмәткәрләре дә бүләкләнде. "Агрокөч - Сервис" АҖенең 5 нче ремонт цехы җитәкчесе Илдус Мөхәммәтшинга "Татарстан Республикасының атказанган авыл хуҗалыгы хезмәткәре" дигән мактаулы исем бирелде. «Агрокөч» АҖенең 2 хезмәткәренә Татарстан Республикасы Министрлар Кабинетының,4 авыл хуҗалыгы хезмәткәренә Татарстан Республикасы Авыл хуҗалыгы һәм азык-төлек министрлыгының Рәхмәте белдерелде, 5 кеше район башлыгының Мактау грамотасы белән бүләкләнде. Барлыгы 153 авыл хуҗалыгы һәм эшкәртү сәнәгате хезмәткәре бүләкләнде, аларның 52се сәхнәгә чакырылды. Бәйрәм дәвамында авыл хуҗалыгы хезмәткәрләрен район үзешчәннәре, «Татарстан» бию ансамбле, «Елмаю» балалар үрнәк хореография коллективы, «Магия» халык хореография ансамбле, «Мирас» халык вокаль-хореография ансамбле үзләренең матур чыгышлары белән сөендерде. Чара Татарстан Республикасының халык артисты Виталий Агапов чыгышы белән тәмамланды.