Зәйнең юллар хезмәте кышкы чорга әзер

Бүген Зәйдә кар җыю техникасын кабул итү булды. Район башлыгы Разиф Кәримов «Татнефтедор» ҖЧҖнең Зәй автомобиль юллары идарәсендә һәм «БлагоСтрой» ҖЧҖ предприятиеләрендә булды, анда юл автотехникасының торышы белән танышты һәм юл хезмәте коллективлары белән очрашты. "Автомобильләр һәм кар җыю техникасы кышкы сезонга тулысынча әзер. Быел КАМАЗ базасында кышкы сезонда кирәкле булган тагын бер катнаш юл машинасы сатып алынды. Бүгенге көндә предприятиедә 10 комплекслы юл машинасы, 4 автогрейдер, 3 К-700 тракторы, 2 бульдозер, Ротор җайланмасы белән җиһазландырылган УРАЛ автомобиле бар. Запас белән 7 мең тоннага якын ком-тоз катнашмасы әзерләдек. Кышкы чорда Зәй районы буенча 418 чакрым юлга хезмәт күрсәтәчәкбез", - диде предприятие җитәкчесе Марат Сыраев. Теләсә нинди һава торышы булганда юллар машина йөртүчеләр өчен үтә торган булып калырга тиеш. 1 ноябрьдән инженер-техник хезмәткәрләр, катнаш юл машиналары һәм йөк төягечләр йөртүчеләр тәүлек буе кизү тора башлаячак һәм район юлларында контрольлек итә башлаячак. Техниканы караганнан соң район башлыгы эшчеләр белән аралашты. Разиф Галиевич узган кыш предприятие эшенең югары нәтиҗәлелеген билгеләп үтте, юл хуҗалыгы хезмәткәрләренә киләсе сезонда уңышлар теләде. «Благострой» оешмасының автопаркында 17 берәмлек юл техникасы бар. Коллектив тәҗрибәле юл эшчеләреннән сайлап алынган. Бозга каршы реагентлар җитәрлек. "Шәһәр эчендәге юллар һәм тротуарлар кардан һәм боздан чистартылсын өчен, халык теләсә нинди һава шартларында уңайсызлыклар сизмәсен өчен, без бар булган көчебезне эшкә җигәргә ниятлибез", - диде «Благострой» ҖЧҖ җитәкчесе Максим Сабанов. Разиф Галиевич үзенең чыгышында «Благострой» җәмгыятенең шәһәр юлларын һәм тротуарларын вакытында кардан чистартуын, карны чыгаруын һәм язгы ташуларга юл куймавын билгеләп үтте. Район башлыгы шулай ук оешманың автопаркы мөмкин булганча яңартылачагын әйтте, хезмәткәрләргә эшләрендә уңышлар теләде.