Дмитрий Сапожников Зәй районының коммуналь инфраструктура объектларында булды

Эш визиты белән Зәй районына ТР Тарифлар буенча Дәүләт комитеты рәисе урынбасары Дмитрий Сапожников килде. Рәис урынбасары Түбән Кама газ Зәй ЭПУның район эксплуатация-газ хезмәте башлыгы Радик Гыймаев белән районда догазификация программасын гамәлгә ашыру буенча эшлекле киңәшмә үткәрде. Киңәшмәдә халыкның җир кишәрлекләренә бушлай газ кертү чаралары һәм килеп туган проблемалы мәсьәләләр турында фикер алыштылар. Соңрак Дмитрий Сапожников программада катнашучы йортларда булды һәм халык белән аралашты. Шулай ук идарәче компанияләр һәм торак милекчеләре ширкәтләре вәкилләре белән Зәй шәһәрендә торак тарифларын билгеләү һәм күпфатирлы йортларны карап тоту мәсьәләләре буенча фикер алыштылар. Аннары башкарма комитет җитәкчесенең икътисадый үсеш, сәнәгать, сәүдә һәм эшмәкәрлеккә ярдәм буенча урынбасары Марат Хәбибуллин озатуында рәис урынбасары Имәнлебаш авылындагы мәдәният йортының котельныенда булды. «Теплосервис» ҖЧҖнең баш инженеры Евгений Храмов эш барышы белән таныштырды. Аннан соң су белән тәэмин итү хезмәтләре объектын карау булды. Зәй районында бу хезмәтне «Зәй водоканалы»ҖЧҖ күрсәтә. Компаниягә 2015 елда нигез салынган. Эшчәнлекнең төп төре-Зәй шәһәрен су белән тәэмин итү челтәрләренә тоташтыру, су белән тәэмин итү һәм агынты суларны агызу. Биологик чистарту корылмаларыннан соң Дмитрий Сапожников каты көнкүреш калдыклары полигоны эше белән танышты. Район территориясендә бер каты көнкүреш калдыклары полигоны эшли. Каты көнкүреш калдыклары полигоны Шепкә авылында, Зәй шәһәреннән 10 км төньяк-көнбатыштарак урнашкан. Файдалануга 2002 елда тапшырылган, объектның гомуми мәйданы 8,2 га.полигонның чынлыкта сыйдырышлылыгы 373 мең м3 тәшкил итә (проект буенча). Каты көнкүреш калдыклары полигонында калдыкларны сортларга аеру, пластик шешәләрне һәм алюминий банкаларны пресслау оештырылган. Шунысын да билгеләп үтәргә кирәк, гражданнарны күчмә кабул итүләр Дәүләт комитеты җитәкчелеге тарафыннан даими рәвештә үткәрелә һәм халыкның тарифлар ясау өлешендә сорауларына аеруча оператив җавап бирергә мөмкинлек бирә. Җайга салынучы субъектлар объектларының күчмә мониторингы нәтиҗәләре 2025 елга тарифлар билгеләнгәндә исәпкә алыначак.