Зәй муниципаль районы мәктәпләрендә Белем көненә багышланган тантаналы линейкалар узды

2 сентябрь көнне Зәй муниципаль районы мәктәпләрендә, шулай ук Зәй политехника көллиятенең беренче курс студентлары өчен Белем көненә багышланган бәйрәм линейкалары узды. 420 беренче сыйныф укучысы-олылар тормышына, 155 беренче курс укучысы һөнәри белемгә беренче адымнарын ясады. Укучылар, студентлар һәм аларның әти-әниләре белән бергә тантаналы чараларда район җитәкчелеге дә катнашты. Зәй муниципаль районы башлыгы Кәримов Разиф Гали улы һәм мәгариф идарәсе җитәкчесе Сәфәргалиев Эрнст Рәис улы Зәй политехника көллиятендә һәм 6 нчы мәктәптә тантаналы линейкаларда булдылар. Разиф Гали улы мәктәп укучыларын, беренче курс студентларын, педагогларны һәм ата-аналарны бәйрәм белән котлады һәм һәркемгә үгет-нәсыйхәт сүзләре белән мөрәҗәгать итте. Зәй муниципаль районы башлыгы урынбасары 2нче мәктәп укучыларын яңа уку елы башлану белән тәбрикләде. Зәй муниципаль районы Башкарма комитеты җитәкчесе Галиев Эмиль Эдуард улы 3 нче мәктәп чарасында катнашты.