Зәйлеләр махсус хәрби операциядә катнашкан солдатны соңгы юлга озаттылар

Бүген Зәй халкы Якты Күлдә туып үскән махсус хәрби операциядә катнашкан кече серант Медведев Иван Яковлевич белән хушлашты. Ул хәрби бурычны үтәү барышында һәлак булган. Матәм чарасы “Энергетик” мәдәният сараенда узды. Район башлыгы Р.Г. Кәримов хәрбинең хатыны, апалары, туганнары һәм якыннарының кайгысын уртаклашу сүзләре белән мөрәҗәгать итте. "Хөрмәтле Эльмира Әгълямовна, Медведев Иванның туганнары һәм якыннары! Өченче ел Россия махсус операция кысаларында яши. Беренче көннәрдән үк якташларыбыз Ватанны саклауга үз теләкләре белән китте, контракт имзалады. Бүген зәйлеләр безнең тынычлыкны батырларча яклыйлар. Кызганычка каршы сугыш югалтуларсыз булмый. Бүген без үзебезнең якташыбыз Медведев Иван Яковлевичны соңгы юлга озатабыз. Татарстан Республикасы Рәисе, шәхсән үзем һәм барлык зәйлеләр исеменнән аны югалту уңаеннан чын күңелдән кайгыгызны уртаклашам. Илебезне саклаучыларга мәңгелек дан һәм якты истәлекләр!” - диде Разиф Галиевич. Шулай ук җыелучылар алдында РФ Оборона министрлыгы, ТР хәрби комиссариты исеменнән Зәй шәһәре һәм Зәй районы хәрби комиссары Айрат Әгъләмҗанов чыгыш ясады. Хәрби хезмәткәрне соңгы юлга бөтен хәрби хөрмәтләрне үтәп озаттылар. Солдатны бер минут тынлык белән искә алдылар. Иван Яковлевичны туган авылы зиратында җирләделәр. Зәйлеләр күңелендә каһарман турындагы истәлек мәңге сакланыр.