Зәй районында "Питрау - 2024" керәшен бәйрәме узды

Бүген Баграж авыл җирлегенең Кашкатау итәгендә Питрау -2024 керәшен бәйрәме үткәрелде. Чара «Халыкның нык бәйләнеше» дип исемләнгән сәхнәләштерелгән тамашадан башланды. Питрау кунакларын бәйрәм белән район башлыгы Разиф Кәримов, республика керәшеннәр оешмасы рәисе Иван Егоров, Татарстан Республикасы Дәүләт Советы депутатлары Илшат Әминов һәм Николай Нефедов котладылар. Быелгы Питрау –юбилей Питравы, районда ул 25 нче мәртәбә үткәрелә. Беренче бәйрәмнең оештыручылары һәм иганәчеләре җылы сүзләр һәм лаеклы бүләкләр белән билгеләп үтелде. Керәшен мәдәниятен саклауга һәм үстерүгә, милләтара тынычлыкны һәм татулыкны ныгытуга керткән зур өлеше өчен Зәй муниципаль районы Башлыгы Рәхмәт хаты белән Татарстан Республикасы керәшен иҗтимагый оешмасының Зәй бүлеге рәисе Атласов Валентин Александрович бүләкләнде. «Питрау» керәшен мәдәнияте бәйрәмен оештыруда һәм үткәрүдә күп еллар актив катнашканы өчен Зәй муниципаль районы башлыгы Рәхмәт хаты белән Район мәдәният йортының сәнгать җитәкчесе Ольга Агашкина, автоклуб мөдире Сирена Хөснетдинова, Николай Григорьев, Петр Минеев бүләкләнде. Авыл җирлекләре милли ишегалларын бизәгән иде, анда ата-бабаларның традицияләре генә түгел, ә хәзерге заман мәдәнияте, Зәй осталарының уникаль эшләнмәләре дә тәкъдим ителгән. Төрле мәйданчыклар үз эшен алып барды, анда һәркем үзенә ошаган шөгыль таба алды. Актив ял яратучылар халык уеннарында һәм конкурсларында, спорт ярышларында катнаштылар. Питрауда өлкән буын вәкилләрен, юбилярларны, яңа туганнарны, яңа гына өйләнгән һәм озак гомер кичергән парларны котлау яхшы традициягә әверелде. Сәхнәгә бер-бер артлы быел 91 яшен тутырган Владимир Мартемьянов, 50 ел бергә яшәгән Иван һәм Мария Тазовлар гаиләсе, бүген генә кавышкан Алина һәм Илнур Галиевлар күтәрелде. Шулай ук җирлекнең яңа туган сабыйлары да бүләкләр белән билгеләп үтелде. Кече сәхнәдә «Питрау чибәре-2024», «Гаилә-гомер бишегем», «Моңлы тавыш 60+», «Керәшен җыруы әйтә балалар» конкурслары узды. Үз чыгышлары белән кичәне Татарстан Республикасының «Агидель» Дәүләт җыр һәм бию ансамбле, Чаллы шәһәренең «Карендәшләр» фольклор коллективы, Светлана Минеева, «Бәллүр» триосы, Татарстанның халык артисты Виталий Агапов бизәде. Чара бәйрәм учагы һәм төрле буын һәм милләт кешеләрен берләштергән «Халыклар дуслыгы» хорводы белән тәмамланды.