Зәй районы Татарстан башкаласында узган Сабантуйда күпмилләтле ишегалдын тәкъдим итте

Бүген Зәй районы башлыгы Разиф Гали улы Кәримов җитәкчелегендәге делегация Татарстан башкаласы Казанның төп мәйданчыгында – Мирный бистәсенең каенлыкта узган Сабантуйда катнашты. Бәйрәмдә Зәй үз ишегалдын тәкъдим итте, анда район территориясендә яшәүче халыкларның көнкүреше, гореф-гадәтләре, мәдәнияте һәм милли үзенчәлекләре, уңышлары һәм казанышлары чагылыш тапты. Зәй ишегалдында Татарстан Республикасы Рәисе Рөстәм Нургали улы Миңнеханов һәм башка хөрмәтле кунаклар булды. Аларны гармунчылар, чәк-чәк,икмәк һәм кош теле белән милли киемнәрдән киенгән кызлар, "Магия" халык-хореография төркеме, Балалар музыка мәктәбенең халык уен кораллары ансамбле катнашында музыкаль программа белән каршы алдылар. Зәй ишегалдының үзәк өлешендә милли көрәш буенча ярышлар узды. Кунаклар көрәшне зур теләк белән карадылар. Зәйлеләр кунакларга уңай эмоцияләр бүләк иттеләр. Сабантуйның барлык кунакларын авыл мичендә пешкән тәмле коймаклар һәм хуш исле чәй белән сыйладылар, кыстыбыйны борынгы рецепт буенча әзерләү буенча мастер-класслар, агачтан уеп ясау һәм курай ясау, халык биюләре, умартачылар күргәзмәсе, борынгы тегермәнне күрсәттеләр, чын мунчада парланырга чакырдылар.