Зәйнең социаль хезмәткәрләре һөнәри бәйрәмнәрен билгеләп үттеләр
Бүген «Шатлык» халыкка социаль хезмәт күрсәтү үзәгендә бәйрәм чарасына башкаларның проблемаларына битараф булмаган һәм һәрвакыт кирәкле вакытта ярдәм кулы сузган кешеләр җыелды. Социаль хезмәткәрләрне һөнәри бәйрәмнәре белән район башлыгы Разиф Кәримов котлады. " Сез кешеләргә авыр булганда ярдәмгә киләсез һәм аларның язмышын җиңеләйтү өчен мөмкин булганның барысын да эшлисез, - дип билгеләп үтте Разиф Гали улы. Ул шулай ук социаль өлкә хезмәткәрләренә үз эшләренә сизгер һәм җаваплы карашлары өчен рәхмәт белдерде, аларга алга таба да уңышлар теләде. Тантаналы шартларда учреждение хезмәткәрләре республика һәм муниципаль дәрәҗәдәге лаеклы бүләкләр алдылар. Зәй муниципаль районы халыкны социаль яклау тармагында күпьеллык һәм намуслы хезмәтләре өчен, шулай ук һөнәри бәйрәмнәре -социаль хезмәткәр көне уңаеннан, Татарстан Республикасы Хезмәт, халыкны эш белән тәэмин итү һәм социаль яклау министрлыгының Рәхмәт хаты белән Анатолий Гавриш, Елена Сандимирова, Азат Нәбиуллин бүләкләнделәр. 11 хезмәткәр Мактау грамотасы, 2 кеше Зәй муниципаль районы башлыгының Рәхмәт хаты белән бүләкләнде. "Безнең эшебездә иң мөһиме-кешеләрне ярату. Безнең коллективта очраклы хезмәткәрләр юк, чөнки безнең хезмәттә социаль хезмәтләр алучыларның рухын күтәреп, кызгану һәм теләктәшлек күрсәтә белергә кирәк, - дип котлады үз кул астында эшләүчеләрне районның социаль яклау бүлеге башлыгы Эльмира Хуҗина. Бу көнне районның социаль хезмәт ветераннарына аерым рәхмәт сүзләре яңгырады, алар бүлекнең бүгенге уңышлы эшенә нигез салучылар.