Зәйлеләр Бөтенроссия шимбә өмәсенә кушылды

Бүген зәйлеләр бердәм рәвештә бөтенроссия өмәсе кысаларында үзләренә беркетелгән территорияләрне җыештырырга чыктылар. Төп көчләр җәмәгать киңлекләрен җыештыруга һәм чистартуга юнәлтелгән иде. Район Советы һәм Башкарма комитеты, статистика бүлеге, финанс-бюджет Палатасы, авыл хуҗалыгы һәм азык-төлек, мәгариф идарәләре Р.Ш. Фәрдиев исемендәге шәһәр паркында, мәдәният, яшьләр һәм спорт идарәләре хезмәткәрләре үзләренә беркетелгән урамнарда хезмәт куйдылар. Шәһәрдә тәртип урнаштыру эше алдагы көннәрдә дә барды, бюджет өлкәсенең күп кенә учреждениеләре, предприятие һәм оешмалар үз территорияләрендә апрель башыннан һәм чәршәмбе һәм җомга саен җыештыру эшләре белән шөгыльләнделәр: кар тараттылар, чисталык урнаштырдылар, шулай ук агачлар агарттылар. Күмәк көч белән шәһәр күзгә күренеп үзгәрә, чистара бара, каралган парк һәм скверлары белән күзне иркәли. Май бәйрәмнәренә шәһәр урамнары һәм ишегаллары, авыл торак пунктлары ялт итеп торырга тиеш. Бүген бу игелекле эштә 5000 якын кеше катнашты.