«Уймак кыз» балалар бакчасында «Табигать белгечләре» брейн-рингы

«Табигатьне яратырга, аны белергә кирәк!» Шундый девиз астында «Уймак кыз» балалар бакчасында «Табигать белгечләре» дигән мавыктыргыч интерактив брейн-ринг уены узды. Уенда «Күкчәчәк» мәктәпкә әзерлек төркеменә йөрүче 22 бала җәнлекләр, үсемлекләр, кошлар, бөҗәкләр тормышын, туган як табигатен ни дәрәҗәдә яхшы белүләрен, табигатьтә үзләрен дөрес тота белүләрен һәм аны сакларга әзер булуларын күрсәттеләр. Малайлар һәм кызлар «Табигатьнең яшь коткаручылары» һәм «Табигать дуслары» командаларына бүленеп, бергәләшеп җавап бирделәр. Экранда тәкъдим ителгән 5 категория сораулардан үзләре теләгәнен күзаллап, сорау номерын сайлап җавап кайтардылар. Балалар үзләре сайлаган сорауларга бик теләп җавап бирделәр. Үзләренең дөрес җавапларына гына түгел, көндәшләренең дә дөрес җавапларына сөенделәр. Экологик билгеләрне яхшы аерып, табигатьтә үз-үзеңне дөрес тоту кагыйдәләрен төгәл тасвирлап бирделәр. Барысы да үзләрен чын табигать белгечләре итеп күрсәттеләр һәм медальләр белән бүләкләнде.