Зәй районы хезмәтчәннәре сабан культураларын чәчүгә керештеләр

Бүген Зәй районы хезмәтчәннәре район башлыгы Разиф Кәримов һәм район имам-мөхтәсибе Фатих хәзрәт Нуруллинның хәер-фатихасын алып, сабан культураларын чәчүгә керештеләр. Быел язгы культуралар чәчелә торган мәйдан 14,2 мең га тәшкил итәчәк. Басуларга 6 чәчү комплексы чыкты, дым каплатуда 90нан артык тырмалау агрегаты эшли. Тракторларны тәҗрибәле механизаторлар: Никандров Михаил, Хафизов Рамил, Хәйруллин Илдус, Мөхәммәтдинов Рөстәм иярли. Агрегатларның тәүлек буе эшләве оештырылган. "Механизаторларның кәефе яхшы, орлыклар, ягулык-майлау материаллары тулы күләмдә кайтартылган, техника әзер, эшләргә генә кала, барлык технологик таләпләрне үтәп, чәчү эшләрен кыска срокларга төгәлләргә”, - дип билгеләп үтте район башлыгы Разиф Галиевич Кәримов. Язгы чәчү өчен район хуҗалыкларына 6,3 мең тонна сабан культуралары орлыгы кирәк. Хәзерге вакытта, иминият фондын исәпкә алып, язгы бөртекле культурага ихтыяҗ тулысынча тәэмин ителгән.