Алар – Хөкүмәт стипендиатлары

Талантлы яшьләрне дәүләт тарафыннан яклау, интеллектуаль потенциалны үстерү максатыннан ил, республика Хөкүмәте студентлар, аспирантлар өчен махсус стипендияләр билгеләү турында карарлар кабул итте. Әлеге югары бүләккә лаек булу өчен студентларга күп тырышырга, яхшы уку өстенә, төрле дәрәҗә олимпиадалар, конкурсларда, һөнәри осталык бәйгеләрендә эксперименталь, фәнни-тикшеренү эшләрендә катнашып, җиңү яуларга кирәк.
Мондый стипендиягә дәгъва итәрдәй тырыш, сәләтле студентлар безнең политехник колледжда да бар. Тырышып уку белән бергә алар шәһәр-районның иҗтимагый тормышында да актив катнаша, уку йортының йөзек кашлары булып тора. Колледж советы карары нигезендә стипендиягә тәкъдим ителгән 7 студент та министрлык белгечләре тарафыннан лаек дип табылды. 2012 ел нәтиҗәләре буенча “Монтаж һәм сәнәгать җиһазларыннан техник файдалану” белгечлеге буенча укучы 1201нче төркем студентлары Денис Блинов, Антон Никитин, Вадим Серебряков, Сергей Платонов, Антон Шибаев һәм “Электр җиһазларына хезмәт күрсәтү һәм ремонтлау буенча электр монтеры” һөнәре буенча белем алучы 401нче төркем студенты Михаил Ильков – Россия Федерациясе Хөкүмәте, ә “Икътисад һәм бухгалтер исәбе” белгечлеге буенча укучы 1101нче төркем студенты Надежда Урамова Татарстан Республикасы Хөкүмәтенең махсус стипендиясен алачак.