Зәйлеләр шәһәр ишегалларын төзекләндерү буенча анкеталаштыруда актив катнаша

Анкеталарны күп кенә шәһәр халкы алдан ук алды. 8 сентябрьдә бердәм тавыш бирү көнендә, ТР Дәүләт Советына депутатлар сайлау белән бергә, Зәйдә ишегалды киңлекләрен төзекләндерү буенча анкета уза. Һәр кеше йорт яны территорияләрен төзекләндерүнең иң өстенлекле юнәлешләре: яшелләндерү, яктырту, парковка урыннарын арттыру, кече архитектура формалары урнаштыру, шулай ук калдыкларны аерым җыю өчен чүп контейнерлары турында үз фикерләрен белдерә ала. Анкеталау 20 августтан «Безнең ишегалды» яңа республика программасы башлануын игълан иткән, ТР Президенты Рөстәм Миңнеханов кушуы буенча үткәрелә. Бу программаны гамәлгә ашыру инициативасы белән быел яз Татарстанның «Бердәм Россия»партиясе чыкты. Программа кысаларында өч ел эчендә Татарстанда республиканың барлык районнарында һәм шәһәрләрендә күпфатирлы йортларның ишегалды киңлекләрен ремонтлау һәм төзекләндерү эшләре башкарылачак. Программаны тормышка ашыру өчен 50 млрд. сум (шул исәптән республиканың нефть компанияләре керемнәреннән)дә акча бүлеп биреләчәк. Программаны гамәлгә ашыру 2020 елда башлана. Хәзерге вакытта республиканың барлык йорт яны территорияләрен паспортлаштыру төгәлләнде, белгечләр проектларны әзерләүгә керештеләр.