Бөртекле культураларны урып-җыю эшләре тәмамланганнан соң берничә комбайнчы республиканың башка районнарына ярдәмгә китте

Район аграрийлары республикада беренчеләрдән булып бөртекле культуралар суктыруны төгәлләделәр һәм уңыш буенча лидерлар булып чыктылар. Район буенча бөртеклеләрнең тулаем җыемы 152,2 мең тоннадан артып китә. Бөртеклеләрнең уртача уңышы гектарыннан 40,1 центнер тәшкил итте -бүгенге көндә бу республика буенча иң яхшы күрсәткеч. «Зәй» агрофирмасында һәр гектардан 48,1 центнер ашлык алдылар, республика буенча уртача күрсәткеч-30,1 ц/га. Илдус Фәтхуллин, Азат Мөфтахов һәм тагын кайбер алдынгы комбайнчыларның ашлык суктыру күрсәткечләре 4 мең тоннага якын, ә Андрей Митрофанов 4 мең тоннадан артык ашлык суктырган. Районда урып-җыюны тәмамлап, берничә комбайнчы башка районнарга юл тотты. Анда алар “Агрокөч” компаниясе агрофирмаларында бөртеклеләрне суктыруны төгәлләргә булышачак. Хәзерге вакытта районда шикәр чөгендерен җыю темпы арта бара, ул 9 мең 337 га үстерелде, бу республикада әлеге культураның урып-җыю мәйданының 14,4% ын тәшкил итә. 6 сентябрьгә татлы тамыр 1 мең 370 гектардан казып алынган, 63 мең тоннадан артык уңыш җыелган. Уңдырышлылык-460 ц/га. Район авыл хуҗалыгы җитештерүчеләре Зәй шикәр заводына тәүлегенә 5-5,5 мең тоннага кадәр татлы тамыр озаталар. Ә 10 сентябрьдән хуҗалыкларда шикәр чөгендерен тәүлек әйләнә казуга керешәчәкләр, бу исә эшкәртүгә җибәрелә торган чимал күләмен арттырырга мөмкинлек бирәчәк.