Зәй районы бөртекле культуралар җыюны уңышлы төгәлләде

Татарстан Республикасы Зәй муниципаль районы игенчеләре 38 мең гектар мәйданда, бөртекле культуралар җыюны уңышлы төгәлләделәр. Игенчелеккә фәнни якын килү, агротехник чараларны үз вакытында һәм сыйфатлы үткәрү һәм механизаторларның тырыш хезмәте нәтиҗәсендә һәр гектардан 40,1 центнер ашлык җыеп алынды. Тулай җыем 152 мең тонна тәшкил итте. Икмәк кабул итү предприятиеләренә 120 мең тоннадан артык икмәк озатылган, шул исәптән 70 мең тоннадан артык азык-төлек бодае, ашлык тапшыру дәвам итә. Район кырларында 56 ашлык җыю комбайны эшләде, шуларның 42се 2000 тоннадан артык ашлык суктырды. Митрофанов Андрей - Клаас Тукано - 450 комбайнында 4200 тоннадан артык ашлык суктырган. Комбайнчылар Мөфтахов Азат, Гыйниятуллин Динар, Фәтхуллин Илдус, Сыйбгатуллин Рамил 4000 тонна ашлык суктырган.