Зәй районында юбилярны котладылар

2019 елның 4 сентябре, чәршәмбе

4 сентябрь көнне Куш-Елга авылында гомер итүче Юнысова Икълимә Сәлахетдин кызы 90 яшьлек юбилеен билгеләп үтте. Юбилярны котларга район башлыгы урынбасары Акатьев Валерий Григорьевич һәм район мәдәният йорты автоклубы хезмәткәрләре килде. Икълимә апа хөрмәтенә җылы теләкләр һәм яраткан җырлары яңгырады, истәлекле бүләкләр тапшырылды. Икълимә Сәлахетдин кызы Куш-Елга авылы мәдәният йортында 40 ел техник персонал булып эшләгән. Тол калган, берүзе өч бала тәрбияләп үстергән. Хәзерге вакытта авылда олы улы белән яши. Халык арасында абруй һәм хөрмәт казана. Яраткан әни, 5 оныгы һәм 5 оныкчыгы бар.