Татарстан Республикасы Президенты Рөстәм Миңнеханов Зәй муниципаль районының ике авыл җирлеге башлыгына яңа эш автомобильләре ачкычларын тапшырды

Яңа автомобиль ачкычларын Югары Пәнәче һәм Бохарай авыл җирлекләре башлыклары алды. Бүген Казанда ТР Дәүләт Советы бинасы каршындагы мәйданда Татарстан Республикасы көненә багышланган муниципаль берәмлекләр арасында уздырылган республика смотр-конкурсында җиңүчеләрне бүләкләү тантанасы булды. Авыл һәм муниципалитет башлыклары Татарстан Республикасы Президенты Рөстәм Миңнеханов кулыннан яңа эш автомобильләре ачкычларын алдылар. Президент чарада катнашучыларны Татарстан Республикасы көне белән котлады һәм уртак нәтиҗәле эш өчен рәхмәт белдерде. «Безнең җирле үзидарәгә ярдәм итү программасы эшли. Ел саен без алар өчен яңа машиналар бирәбез. Бу аларның мобильлеген һәм статусын арттырырга ярдәм итә. Алга таба да актив эшләвегезне телим», - диде ТР Президенты. Конкурста барлык муниципаль районнар һәм 2 шәһәр округы катнашты. Барлыгы 201 гариза керде. Район башлыгы Разиф Кәримов район авыл җирлекләре өчен Шевроле Нива маркалы ике яңа машина ачкычын Президент кулыннан алды. Республиканың 93 авыл җирлеге -җиңел автомобильләр, 7 шәһәр округының муниципаль учреждениесе-Форд транзит маркалы автобуслар алды.