Зәйдә ана капиталы сертификатын тапшыру тантанасы узды

Бүген Зәй муниципаль районы Башкарма комитеты җитәкчесе Хафизов Илнар Фәнил улы катнашында 13 гаиләгә ана капиталы сертификатын тапшыру тантанасы узды. Алар исеменә район Башкарма комитет җитәкчесе Илнар Хафизов һәм ЗАГС бүлеге башлыгы Гөлфия Вәлишина исеменнән бик күп җылы сүзләр әйтелде. Россия Федерациясенең 2006 елның 29 декабрендә кабул ителгән Федераль законын тормышка ашыру кысаларында, Зәй районы һәм Зәй шәһәре Пенсия фонды идарәсе ана (гаилә) капиталына дәүләт сертификатлары бирә. Районда 2007 ел башыннан бирле 3 670 сертификат бирелгән. 2019 елда 122 гаилә сертификат алды инде. Ана (гаилә) капиталы торак шартларын яхшырту, балаларны укыту, ананың булачак пенсиясен арттыру, айлык түләү алу (түбән керемле гаиләләргә бирелә), инвалид балаларны җәмгыятькә социаль адаптацияләү өчен билгеләнгән товарлар һәм хезмәт күрсәтүләре сатып алу өчен кулланылырга мөмкин. Зәй районында ана капиталы акчалары күбрәк торак шартларын яхшырту: ипотеканы өлешчә түләү яки торак сатып алуда кулланыла.