Зәй районының 9 мәктәбендә чыгарылыш кичәләре уза
Бүген Зәй муниципаль районында 177 чыгарылыш укучысы мәктәп белән хушлаша. Укуда иң югары нәтиҗәләр өчен 37 укучы алтын медаль белән бүләкләнә. Алар арасында рус теленнән 100 балл җыючы укучылар: Зиганшина Алина (Татар гимназиясе), Романюк Диана (2нче мәктәп), Рыбак Дарья (Сәвәләй мәктәбе). Гамьсез балачак еллары, мәктәп дәресләре, тәнәфесләр артта калды. Алда - бөтенләй башка, яңа тормыш һәм һәркайсыгызны үз юлы көтә. Киләчәктә нинди генә уңышларга ирешсәгез дә сез бу көнне һәрвакыт иң җылы хисләр белән сагынып искә алырсыз. Мәктәп елларында чын дуслар таптыгыз, ныклы белем алдыгыз, үз ачышларыгыз өчен - шатлану, хаталарыгыз өчен ачыну хисләре кичердегез. Мәктәп елларында туплаган тәҗрибә һәм белемнәрегез тормышта үз урыныгызны табарга һәм уңышка ирешергә, туган илебезнең матур киләчәге өчен үз өлешегезне кертергә ярдәм итәр, дип ышанабыз. Иң мөһиме- һәрвакыт игелекле, намуслы һәм тәртипле кешеләр булыгыз. Яхшы якка үзгәрү һәм алга таба хәрәкәт итү теләген беркайчан да югалтмагыз. Алдыгызга иң кыю максатлар куегыз һәм аларны тормышка ашырыгыз. Туган җирегезне онытмагыз һәм горурланыгыз. Уңышлар һәм якты, мавыктыргыч тормыш сезгә!