Район башлыгы авыл хуҗалыгындагы эшләрнең барышы белән танышты

19 нчы июнь көнне район башлыгы Разиф Кәримов авыл хуҗалыгындагы эшләрнең барышы белән танышып йөрде. Анда авыл хуҗалыгы һәм азык-төлек идарәсе белгечләре, "Агрокөч" АҖенең икътисад, хезмәт һәм эш белән тәэмин итү бүлеге белгечләре катнашты. Рейд кысаларында "Нива" ҖЧҖ, "Бура Киртә", "Дүрт Мунча", “Куш-Елга" сөтчелек комплексларында булдылар. Комплекс белгечләре һәм эшчеләр белән очрашуда терлекчеләрнең һәм терлекчелек тармагы механизаторларының хезмәт хакы мәсьәләсенә аерым игътибар бирелде. Район башлыгы Р.Г. Кәримов терлекчелек тармагы кайбер категория эшчеләренең тариф ставкаларын арттыру мөмкинлеген карарга тәкъдим итте. Алар шулай ук сөт җитештерү һәм сату процессы, терлек азыгы әзерләүнең барышы белән таныштылар. Күпьеллык үләннәрнең беренче катын чабып алу һәм сенаж салуны кыска вакыт эчендә төгәлләү, тәүлеклек савымны 90 тоннага җиткерү бурычы куелды. "Куш-Елга" һәм "Әхмәт" фермалары белгечләренә сыерларны бракка чыгаруга сак карарга, эре мөгезле терлекләрнең баш саны кимүгә юл куймаска киңәш ителде. Район башлыгы "Поручик" симертү комплексында, "Ю.Шепкә" фермасында терлекчелек биналарын ремонтлау барышы белән танышты. Төзү-ремонт эшләрен тизләтү бурычы куелды. Алда торган бурычларны хәл итү өчен " АГРОКӨЧ "АҖ белән тыгыз элемтәдә эшләргә кирәк.