Зәйдә хезмәтне саклау мәсьәләләре буенча семинар узды

Бүген хакимиятнең зур залында Татарстан Республикасы Хезмәт, халыкны эш белән тәэмин итү һәм социаль яклау министрының беренче урынбасары Рөстәм Вәлиуллов катнашында хезмәтне саклау мәсьәләләре буенча семинар узды. Семинарда катнашучыларга сәламләү сүзе белән район Башкарма комитеты җитәкчесе Илнар Хафизов мөрәҗәгать итте. Зәй муниципаль районында хезмәтне саклау буенча Координация советының эше турында район Башкарма комитеты җитәкчесе урынбасары, хезмәтне саклау буенча Координация советы рәисе Николай Нифатов сөйләде. Рөстәм Фәйзрахман улы Вәлиуллов Татарстан Республикасында хезмәтне саклау һәм хезмәт шартларының торышы турындагы доклад белән чыгыш ясады. Шулай ук җитештерү травматизмын киметү буенча кисәтү чараларын финанслау, биеклектәге эштә саклану чаралары турында чыгышлар тыңланды. Семинар бүләкләү тантанасы белән тәмамланды. «Уңыш һәм куркынычсызлык» бөтенроссия конкурсының «Мәгариф тармагында хезмәтне саклау өлкәсендә иң яхшы оешма» номинациясендә җиңү яулаган Зәй политехник колледжына Диплом тапшырылды. Куркынычсыз хезмәт шартларын тәэмин итү өлкәсендә нәтиҗәле эшләгәне өчен Татарстан Республикасы Хезмәт, халыкны эш белән тәэмин итү һәм социаль яклау министрлыгының Мактау грамоталары белән: “ТЕХНО заводы" җаваплылыгы чикләнгән җәмгыятенең Зәй филиалы, Зәй ГРЭСы филиаллары, район башкарма комитет җитәкчесенең инфраструктура үсеше буенча урынбасары, Зәй муниципаль районының хезмәтне саклау буенча Координация советы рәисе Нифатов Николай Александрович бүләкләнделәр.