Зәйдә Бөек Ватан сугышында Җиңүнең 74 еллыгына багышланган тантаналы митинг узды

"Җиңү безнең йөрәкләрдә". Азатлык китерүче солдат һәйкәле янында узган тантаналы митинг шулай аталган иде. Ул «Без илне бергә күтәрдек» театральләштерелгән тамашасы белән ачылды. Зәй муниципаль районы башлыгы Кәримов Разиф Гали улы Бөек Ватан сугышы ветераннарына һәм митингка җыелганнарга рәхмәт һәм котлау сүзләре белән мөрәҗәгать итте: «11600 зәйле Ватанны сакларга фронтка киткән, алар Сталинград сугышында, Курск дугасында, Көнчыгыш Европа һәм Берлин өчен барган сугышларда катнашканнар. 2 якташыбыз – Григорий Федорович Ларионов һәм Николай Иванович Майков Советлар Союзы геройлары, ә Алексей Афанасиевич Васильев Солдат Даны Орденының тулы кавалеры исемен яулаган. 2800 кеше сугышчан орденнар һәм медальләр белән бүләкләнгән. 7410 зәйле сугыш кырларында башларын салган. Сугышта катнашкан солдатлар сафы елдан-ел сирәгәя бара. Бүген Зәй муниципаль районында Җиңү көнен бары тик 19 Бөек Ватан сугышы ветераны, 3 концлагерь тоткыны, 546 тыл хезмәтчәне, 158 фронтовикның тол хатыны каршы ала. Кадерле ветераннар һәм тыл хезмәтчәннәре! Чын йөрәктән Сезгә нык сәламәтлек, иминлек телим. Язгы кояшның җылысы барыгызга да бәйрәм кәефе бүләк итсен, якыннарыгызның кайгыртуы йөрәкләрегезне җылытсын! Күгебез һәрвакыт аяз, илләребез тыныч булсын! Бөек Җиңү көнен белән!». Бөек Ватан сугышында Җиңүнең 74 еллыгы уңаеннан Татарстан Республикасы Президенты Рөстәм Нургали улы Миңнехановның мөрәҗәгате белән Татарстан Республикасы Хөкүмәтеннән куратор Хәнифов Фәрит Мөдәрис улы чыгыш ясады. Аннары котлау сүзе Зәй шәһәренең хәрби комиссары Айрат Әгъләмҗановка, Аксар авылында яшәүче тыл ветераны Фәйрүзә Миңнуллинага бирелде, яшьләр исеменнән политехник көллият студенты Фоат Сираҗиев чыгыш ясады. Зәйлеләр һәлак булган солдатларны бер минут тынлык белән искә алдылар. Азатлык китерүче солдат һәйкәленә чәчәкләр, гирляндалар, кәрҗиннәр куйдылар.