Зур юллар көтә сезне!

Менә көмеш кыңгыраулар чыңы яңгырый. Көмеш кыңгырау чыңы – ул мәктәпне тәмамлап, зур тормышка, олы гыйлем дөньясына юлланган укучыларны алдагы көннәрнең гаҗәп матур да, тынгысыз да, соклангыч һәм авыр да булачагын искәртеп тора кебек. Кыңгырау авазы – аларның кадерле укытучылары белән хушлашу авазы да.
Укучыларга медальләрне район башлыгы Татьяна Воропаева тапшырды.
– Хөрмәтле егет-кызлар! Сез белем диңгезе буйлап йөзәчәк корабльгә утырасыз. Әлеге корабльнең капитаны булырга омтылыгыз, ышаныч, кыю адымнар белән аны алга алып барыгыз. Кайчакта җил-давыллар да була, тик сез каушап калмагыз, – диде ул.
Медаль алучы егет-кызларның әти-әниләре башкарма комитетның Рәхмәт хатлары белән бүләкләнде. Укытучыларга, мәгариф идарәсенә, район башлыгына чыгарылыш укучылары рәхмәтләрен җиткерделәр. Ата-аналар исеменнән Аксар мәктәбен көмеш медальгә тәмамлаган Сәйдәш Мирсәевнең әнисе Альбина Мирсәева укытучыларга зур рәхмәтен әйтте.
Әйе, медальгә лаек булган егет-кызларның йөзендә шатлыклы елмаю. Аларның бит беренче мәртәбә хезмәтләрен хөрмәтләделәр. Алтын медальгә лаек булучыларның иң күбе – 2нче мәктәптән. Аларда – 11 алтын медаль. 4, 5, 7нче мәктәпне – 1әр, 6нчы мәктәп, татар гимназиясен 2шәр укучы алтын медальгә тәмамлады. Алар арасында 3 авыл мәктәбе дә бар: Сарсаз-Баграж (Радик Утяганов), Югары Мәлем (Фирүзә Абзалова, Язилә Хәкимуллина, Дилә Фәсхетдинова), Югары Шепкә (Язилә Яхина) мәктәпләре.
Радик Утяганов Чаллының югары уку йортында белемен арттырырга җыена. Исәбе – программист булу. Мәктәптә укыганда фән олимпиадаларында катнашкан, спортны ярата. Көрәш буенча үз авырлыгында Сабантуй батыры булган. “Мирас” ансамблендә, “Уйнагыз, гармуннар!” бәйгеләрендә чыгыш ясаган.
Кыскасы, егет-кызлар үзләре укыган мәктәпнең, укытучыларының йөзенә кызыллык китермәсләр дип ышанасы килә.