Зәйдә эш бирүчеләр өчен семинар-киңәшмә узды

Хезмәт вазыйфалары турында онытмаска һәм закон нормаларын төгәл үтәргә. Моның хакында бүген Зәй хакимияте залында эш бирүчеләр һәм кадр хезмәте вәкилләре өчен оештырылган “Эш бирүче. Аның хокуклары һәм вазыйфалары” дип исемләнгән семинар-киңәшмә барышында искәрттеләр. Аны Зәй шәһәренең халык мәшгульлеге үзәге районның Башкарма комитеты белән берлектә уздырды. Зәй районы Башкарма комитеты җитәкчесе Илнар Хафизов әлеге чараның әһәмияте хакында ассызыклады. “Бүген мәгълүмат алуның төрле ысуллары бар. Интернетны ачып, кирәкле мәкаләләргә сылтама табып була. Әмма әлеге мәгълүматның төгәл булуы кирәк, моннан тыш конкрет сораулар буенча консультация алу мөһим”, - дип белдерде ул. Илнар Хафизов сүзләренчә, хезмәт законында һәрдаим үзгәрешләр булып тора. Аны эш бирүчегә дә, хезмәткәргә дә белү зарур. “Бу семинар хезмәт законындагы актуаль мәсьәләләр буенча фикер алышу өчен дә яхшы ысул”, - диде ул. Эш бирүчеләр белән хезмәттәшлек формалары турында Зәй шәһәренең халык мәшгульлеге үзәге директоры вазыйфаларын башкаручы Ольга Лаптева сөйләде. Аерым алганда, ул эш бирүчеләр катнаша алырдай программаларга тукталды. Эш бирүчеләрнең хезмәт вазыйфалары турында Татарстан дәүләт хезмәт инспекциясенең Әлмәт шәһәрендәге бүлеге җитәкчесе урынбасары Владимир Бувальцев чыгыш ясады. Ул хезмәт куркынычсызлыгы, хезмәт килешүләре һәм башка хокукый актлар төзү, хезмәт хакын вакытында түләү кебек мәсьәләләргә тукталды. 2019 елда хезмәт һәм мәшгульлек законындагы үзгәрешләр һәм аларны куллану хакында Төбәк квалификацияләр үсеше агентлыгы белгечләре сөйләде. Семинар кысаларында катнашучылар үзләрен кызыксындырган сорауларга җавап ала алды. Семинар-киңәшмә ахырында мәшгульлек үзәге тарафыннан оештырылган “Җаваплы эш бирүче-2018” конкурсына йомгак ясалды. Физик мөмкинлекләре чикле кешеләр, инвалид бала тәрбияләүче әти-әниләр, күп балалы гаиләләр өчен эш урыннары булдырган, балигъ булмаганнарны укудан буш вакытта хезмәт белән тәэмин иткән һәм һөнәри юнәлеш буенча чараларда актив катнашкан оешма-предприятиеләргә Зәй муниципаль районы Башкарма комитеты җитәкчесе рәхмәт хатын тапшырдылар