Зәйдә балалар өчен һөнәри юнәлеш буенча эш дәвам итә

Зәй шәһәренең халык мәшгульлеге үзәге белгечләре районның мәдәният учреждениеләре хезмәткәрләре белән берлектә берничә чара оештырды. Үзәк шәһәр китапханәсендә мәшгульлек үзәгенең әйдәп баручы инспекторы Эльвира Степанова 6 нчы номерлы мәктәпнең 7 нче сыйныф укучылары өчен һөнәри юнәлеш буенча консультация уздырды, ә Зәй туган якны өйрәнү музеенда 1 нче номерлы мәктәбенең 8-9 нчы сыйныф укучылары белән очрашты. Очрашулар Татарстанда эшче һөнәрләр елы кысаларында, укучылар арасында инженер һәм эшче профессияләрне популярлаштыру максатыннан оештырылды. Профконсультант балаларның нинди һөнәргә өстенлек бирүләрен, кызыксынуларын, киләчәктә аларга туры килердәй профессияләрне ачыклау өчен тест уздырды. Моннан тыш, балалар хезмәт базарында ихтыяҗ зур булган һөнәрләр турында мәгълүмат алды. Тулаем чараларда биш дистәдән артык бала катнашты.