Мәктәп тавында Кышкы уеннар оештырылды

Кышкы уеннар һәркемнең күңеленә гадәти булмаган шатлык китерә һәм сәламәтлек өчен дә файдалы. Кыш җитү белән күңелдә аерым хисләр барлыкка килә һәм бу фасылны күңелле һәм шатлыклы итеп үткәрү теләге уяна. Кыш һәрчак салкыны һәм кар- бураннары, үзенә генә хас бәйрәмнәре белән куандыра. Өйдә утырып булмый! Тизрәк ишегалдына, урамга, саф һавага чыгасы килә, анда чана һәм чаңгылар, боз таулары һәм калкулыклар, кар көртләре һәм башка кышкы уеннар көтеп тора! 3 гыйнвар көнне туган якны өйрәнү музее хезмәткәрләре «Кар атышып уйнау» мавыктыргыч уен – эстафетасы оештырды. 1 нче мәктәпнең 6 нчы сыйныф укучылары уенда бик теләп катнаштылар. Балаларга башта Мәктәп тавы тарихы, Кама аръягы оборона сызыгы һәм ныгытма төзелеше турында сөйләделәр. Аннан соң балалар «Ике Кыш бабай», «Ныгытма алу» уеннары уйнадылар, ә өч иң җитез катнашучы грамоталар белән бүләкләнде. Һәм, әлбәттә инде, иң кызыгы- бер-берсенә кар атышып уйнау булды. Балаларның йөзләре салкыннан һәм елмаюдан балкып торды.