Зәйдә 2018 ел нәтиҗәләренә багышланган бәйрәм тантанасы узды

27 нче декабрь кичендә “Яшьлек” боз сараена 2018 ел нәтиҗәләренә багышланган бәйрәм тантанасына шәһәр һәм район Советы депутатлары, предприятие-оешма җитәкчеләре, хезмәт коллективлары вәкилләре, хезмәт алдынгылары җыелды. Бәйрәм “Йөрәкләрне игелекле эш-гамәлләр җылыта” шигаре астында узды. Район башлыгы Разиф Кәримов тамашачыларны Яңа ел белән котлап, район икътисадының барлык тармаклары эшчәнлегенә нәтиҗә ясады, алдагы елга бурычларны билгеләде. «Зәй муниципаль районы мактаулы гражданины» исеменә район үсешенә намуслы, фидакарь хезмәте белән зур өлеш керткән “Челтәр компаниясе” ААҖ генераль директоры, “Агрокөч” холдингы директорлар советы рәисе, республика биатлон һәм чаңгы ярышлары федерациясе президенты Илшат Фәрдиев; район үзәк дәваханәсенең хирургия бүлеге мөдире Магомед Мурзагов; район авыл хуҗалыгы тармагы ветераны Фалес Вәлиев (үлгәннән соң); Зәйнең элекке халык депутатлары шәһәр Советы рәисе Валериан Некратов (үлгәннән соң); “Зәй шикәре” ААҖ элекке директоры Вячеслав Сыщиков (үлгәннән соң) лаек дип табылды. Тантанада Сөббух Рәфыйков исемендәге үзәк китапханәнең балалар эшләре буенча директор урынбасары Рита Әхмәтовага “Татарстан Республикасының атказанган мәдәният хезмәткәре” мактаулы исеме бирелде, Дүрт-Мунча авыл җирлегенең башкарма комитеты җитәкчесе урынбасары Люция Насыйбуллинага “Татарстан Республикасы җирле үзидарә үсешендәге хезмәтләре өчен” медале тапшырылды. “Ел җитәкчесе” буларак «Аккурайд Уилз Руссиа» ширкәте башкарма директоры Илья Давыдов, “Ел укытучысы” - 6нчы мәктәпнең инглиз теле укытучысы Руслан Мәгъдиев, «Мәгарифтә - инновация» - югары электр көчәнеше астында эшләү үзәге директоры Алмаз Галимов, “Ел спортчысы” - спорт мәктәбе тренеры Регина Салихова һәм Зәй көрәшчеләр җыелма командасыннан Ренас Кәлимуллин, “Ел тренеры” буларак “Зәй” балалар-яшүсмерләр спорт мәктәбенең билбау көрәше буенча тренеры Равил Салиховлар бүләкләнде. “Кышкы әкият” конкурсы җиңүчеләрен бүләкләү бәйрәм чарасына үзенчәлек өстәде. Сәнәгать предприятиеләре арасында беренче урынга “Челтәр компаниясе” ААҖнең Зәй оешмасы лаек дип табылды, II урында – ГРЭС һәм “Теплосервис” ҖЧШ, III урында – “Зәй шикәре” ААҖ. Сәүдә, көнкүреш хезмәте күрсәтүче оешмалар арасында I урынны “Носорог” кафесы яулады. “Транзит” сәүдә йорты һәм “Татнефть”нең ягулык салу станциясе - II, шәхси эшмәкәр Токранов – III урында. Бюджет оешмалары арасында урыннар түбәндәгечә: “Яшьлек” боз сарае – I, балалар музыка мәктәбе һәм “Энергетик” Мәдәният сарае – II, “Барс” спорт мәктәбе III урынны алды. Белем бирү һәм мәктәпкәчә яшьтәге балалар учреждениеләре арасында иң матур бизәлгәне “Күкчәчәк” балалар бакчасы дип табылды (I урын), икенчедә – 7 һәм 4нче мәктәпләр, өченчедә – “Кояшкай” һәм “Якты коңгыз” балалар бакчалары. Авыл җирлекләре арасында Югары Мәлем – I урында, II урынны - Аксар һәм Чыбыклы, III урынны Якты Күл һәм Түбән Биш авыл җирлекләре бүлеште.Торак милекчеләре ширкәтләренең берсенә генә урын бирелде: араларында иң яхшысы дип “Ышаныч” ширкәте табылды. Мәгариф елы районда киң колачлы эш-гамәлләр белән узды. Чараның иң мавыктыргыч мизгеле Мәгариф елының Мәдәният елына юл бирүе булды. Татарстанның атказанган артисты Раяз Фасыйхов зәйлеләргә иң матур җырларын бүләк итте.