Зәйнең 500 укучысы район башлыгы Чыршы бәйрәмендә катнашты

Район башлыгы Чыршы бәйрәме 2018 елның 26 декабрендә «Энергетик» мәдәният йортында узды. Бу чара ел саен укучыларны укыту, спорт, фәнни, иҗади, интеллектуаль һәм башка эшчәнлектә ирешкән уңышлары өчен бүләкләү максатыннан үткәрелә. Чарада шәһәр һәм район мәктәпләреннән 500 бала катнашты. Зәй муниципаль районы башлыгы Разиф Гали улы Кәримов балаларны якынлашып килүче Яңа ел бәйрәме белән котлады, Яңа елда уңышлар, яңа мөмкинлекләр һәм казанышлар, сәламәтлек, тынычлык һәм бәхет теләде. «Зәй муниципаль районының сәләтле балалары» муниципаль программасы кысасында Разиф Гали улы Кәримов «Оста - алтын куллар», «Фәндә беренче адымнар», «Талант һәм иҗат» номинацияләре буенча 30 иҗади, талантлы һәм интеллектуаль балага «Безнең өметләр» Грантын тапшырды. Җиңүчеләр грамоталар һәм кыйммәтле сертификатларга ия булдылар. Зәй районының 500 укучысы бәйрәмнән Яңа ел күчтәнәчләре һәм уңай тәэсирләр белән таралышты.