Зәй муниципаль районы башлыгы Разиф Кәримов юбилярны котлады

Ветераннарны аларның тормышындагы әһәмиятле даталары белән котлау районда күркәм традициягә әверелде. Бүген тыл һәм хезмәт ветераны Елизавета Ивановна Медведевага 95 яшь тулды. Аны гомер бәйрәме белән район башлыгы Разиф Кәримов та котлады. "95 яшьлек юбилеегыз уңаеннан иң җылы һәм ихлас котлауларны кабул итегез! Сезгә – искиткеч кешегә – күпьеллык намуслы хезмәтегез өчен рәхмәт һәм хөрмәт сүзләрен җиткерәсем килә. Сезнең тормыш юлы-үз халкыңа фидакарь хезмәт итү, кешеләргә файда китерү, Ватан хакына игелекле эшләр кылу үрнәге. Сезгә чын күңелдән ныклы сәламәтлек, иминлек, якыннарыгызның игътибарын һәм ярдәмен тоеп яшәвегезне, иртәгесе көнгә ышаныч һәм озын гомер телим!"- диде Разиф Кәримов. Юбилярга Россия Президенты Владимир Путинның котлау открыткасы һәм истәлекле бүләк тапшырылды. Елизавета Ивановна 1923 елның 10 декабрендә Зәйдә туган, күп балалы гаиләдә үскән, сугыш елларында балалар йортында эшләгән. 1946 елда «Бөек Ватан сугышы елларында фидакарь хезмәт өчен " медале белән бүләкләнә. Сугыштан соң Елизавета Медведева Алабуга педагогия училищесын тәмамлый, туган шәһәренә әйләнеп кайтып, бөтен гомерен яраткан тәрбияче һөнәренә багышлый. Күп тапкырлар намуслы хезмәте өчен мактау грамоталары һәм рәхмәт хатлары белән бүләкләнә. Ире Анатолий Николаевич белән ике бала тәрбияләп үстерәләр. Бүген Елизавета Ивановна оныклары, оныкчыклары өчен искиткеч кайгыртучан әби. Олы яшьтә булуына карамастан, әлегә кадәр бакчада яшелчә һәм чәчәкләр үстерә, тәмле пироглар пешерә, китаплар укый.