“Үзеңә ышаныч – уңышка юл”

Бүген Зәй шәһәренең халык мәшгульлеге үзәгендә эшсез инвалидлар өчен “Үзеңә ышаныч – уңышка юл” дип аталган мотивацияләүче тренинг узды. Анда шулай ук “Шатлык” халыкка социаль хезмәт күрсәтү комплекслы үзәге белгече Юлия Верхотурцева катнашты. Тренингта катнашучыларны сәламләп, Зәй шәһәренең халык мәшгульлеге үзәге бүлеге җитәкчесе Ольга Лаптева чараның максаты турында сөйләде. “Әлеге тренинг үз бәяңне арттыруга юнәлдерелгән. Һәрберегез өчен ул файдалы булыр һәм якын арада сезне эшләүче гражданнар арасында күрербез дип ышанам”, - диде ул. Моннан тыш, Ольга Лаптева халык мәшгульлеге үзәге тарафынннан гамәлгә ашырыла торган һәм физик мөмкинлекләре чикле кешеләрне эш белән тәэмин итүгә юнәлдерелгән программалар турында сөйләде. Мотивацияләүче тренинг берничә этапта узды. Баштан катнашучылар психологик тест язды. Ул аларга эчке халәтләрен бәяләргә ярдәм итте. Шуннан соң психолог эш бирүчеләр белән аралашу вакытында туа торган кыенлыклар турында сөйләде һәм үз-үзеңне дөрес тәкъдим итү буенча киңәшләрен бирде.