Зәй районында авыл җирлекләре башлыкларының күчмә семинары узды

Бүген Баграж авыл җирлегендә район башлыгы урынбасары В.Г. Акатьев, район Башкарма комитеты җитәкчесе И.Ф. Хафизов һәм авыл җирлекләре башлыклары катнашында семинар узды. Семинарда катнашучылар Югары Баграж авылында игенчелек белән шөгыльләнүче Александр Усманов КФХын, ат үрчетүче Петр Коронов КФХын, терлекчелек буенча Михаил Кондратьев КФХын карадылар, Олимпия чемпионы Симашов Федор Петрович музеенда булдылар, халык көче белән төзелгән часовняны, грант хисабына борауланган скважинаны карадылар. Шулай ук Сарсаз –Баграж авылының мәктәбе, музее, мәктәпкәчә белем бирү учреждениесендә булдылар. Пленар өлеш авыл клубында узды. Семинарда катнашучыларны район Башкарма комитеты җитәкчесе Илнар Хафизов сәламләде. Баграж авыл җирлеге җирле үзидарә органнарының эше, 2018 елда авыл җирлекләрендә үзара салым программасы буенча башкарылган эшләр, үзара салым буенча 2018 елның 18 ноябрендә узган референдум нәтиҗәләре , авыл җирлекләрендә салым җыю турында һ.б. чыгышлар тыңланды. Киңәшмәгә йомгак ясап, район Башкарма комитеты җитәкчесе Илнар Хафизов авыл җирлекләре башлыкларын көн тәртибендәге мәсьәләләр, аерым алганда, муниципаль милекне рәсмиләштерү, кышкы чорда торак пунктларны тәртиптә тоту буенча эшне активлаштырырга чакырды. Җирлек башлыклары алдына шулай ук шәхси ярдәмче хуҗалыклар, мини –фермалар санын һәм эре мөгезле терлекләр баш санын арттыру бурычы куелды.