“Зәй” һәм “Зәй шикәре” агрофирмалары шикәр чөгендере казуны төгәлләделәр

«Зәй» агрофирмасы хуҗалыкларында шикәр чөгендере 2273 гектарда үстерелгән иде, уртача уңыш бер гектардан 477 центнер тәшкил итте, барлыгы 107 мең тонна татлы тамыр казып алынды. Кырларда «Ропа» маркалы 3 комбайн эшләде. “Зәй шикәре» агрофирмасы бүлекчәләрендә татлы тамыр 2734 гектар мәйданда казылды, уртача уңыш 400 ц тәшкил итте, 109 мең тонна чөгендер җыеп алынды. Басуларда 4 чөгендер җыю комбайны эшләде. Кагатлардан чөгендерне шикәр заводына ташу дәвам итә. Хәзерге вакытта барлык комбайннар «Восток» агрофирмасы кырларында эшли. Авыл хуҗалыгы һәм азык- төлек идарәсеннән алынган мәгълүматларга караганда, 15 октябрьгә татлы тамыр 8600 гектардан җыеп алынган, бу барлык мәйданның 93%ы дигән сүз. Калган 600 гектарны иртәгәгә кадәр казып бетерәчәкләр. Шикәр заводы 613 100 тоннадан артык шикәр чөгендере кабул итте, шуның 195 400 тоннасы Зәй районы агрофирмаларыннан. 365 400 тонна чимал эшкәртелгән, 54 мең тонна шикәр комы алынган.