Зәйдә түгәрәк өстәл артында сөйләшү узды

Бүген “Шатлык” социаль ярдәм күрсәтү үзәге” коммерцияле булмаган автоном оешмасында Халыкара өлкәннәр көне уңаеннан дәүләт, башкарма һәм муниципаль хакимият органнары вәкилләре, иҗтимагый оешмалар, өлкән буын вәкилләре катнашында түгәрәк өстәл утырышы узды. Әлеге очрашуда Татарстан Республикасы хезмәт, халыкны эш белән тәэмин итү һәм социаль яклау министры урынбасары Нигмәтҗанова Энже Нияз кызы катнашты. Утырыш барышында өлкән буын вәкилләре үзләрен борчыган сорауларын җиткерделәр, берьюлы берничә белгечтән квалификацияле консультацияләр алдылар. Түгәрәк өстәл утырышы барышында төрле мәсьәләләр кузгатылды: алар арасында - социаль хезмәтләр күрсәтү, пенсионерлар һәм реабилитация алучы инвалидларга каралган ташламалар, социаль пакет, техник тернәкләндерү җиһазларын, шифаханә - курорт дәвалавы алу мөмкинлеге, аз хәрәкәтләнүче гражданнарга медицина ярдәме күрсәтү һәм башкалар.