Зәйдә билбау көрәше буенча Россия Чемпионаты ачылды

Бүген Зәй шәһәренең спорт-сәламәтләндерү комплексында билбау көрәше буенча Россия чемпионаты ачылды. Ярышларда Россия Федерациясенең 27 төбәгеннән 245 көрәшче, шул исәптән Татарстан Республикасы җыелма командасы составына керүче 8 атаклы Зәй спортчысы катнаша. Бу -Атказанган спорт остасы, өч тапкыр Дөнья чемпионы, өч тапкыр Дөнья Чемпионаты призеры, 8 тапкыр Россия чемпионы исемен яулаган Регина Салихова, Россия Федерациясе спорт остасы, Дөнья Кубогы иясе, Дөнья чемпионатының көмеш һәм бронза призеры, 4 тапкыр Россия чемпионы Екатерина Бусова; халыкара класслы спорт остасы, 2 тапкыр Дөнья чемпионы, Дөнья кубогы иясе Ренас Кәлимуллин; Россия Федерациясе спорт остасы, Дөнья беренчелегенең көмеш призеры, Россия Кубогы җиңүчесе, Россия Кубогының бронза призеры Радик Сәлахов һәм башкалар. Сәламләү сүзе белән Зәй муниципаль районы башлыгы Разиф Кәримов, Татарстан Республикасы Көрәш федерациясе президенты, Татарстан Республикасы Премьер-министры урынбасары - Татарстан Республикасы Авыл хуҗалыгы һәм азык – төлек министры Марат Әхмәтов, билбау көрәше буенча Бөтенроссия федерациясенең I вице - президенты Рушан Рамазанов чыгыш ясадылар һәм спортчыларга уңышлар теләделәр. Ярышлар ике көн дәвамында узачак, җиңүчеләрне һәм призерларны бүләкләү бүген 18.00 сәгатьтә һәм иртәгә 18.30 сәгатьтә булачак. Чемпионатны ябу тантанасы 6 октябрьдә 18.00 сәгатькә билгеләнгән.