Зәй районында «Иҗат юлы» фестивале старт алды

Сәламәт яшәү рәвешен пропагандалау, балалар һәм яшьләрнең иҗади активлыгын үстерү, инициативаны, иҗатны стимуллаштыру, мәдәният учреждениеләре эшчәнлегендә яңа технологияләр, эш формаларын һәм алымнарын кертү, авыл халкының ялын оештыру максатыннан стационар мәдәни - ял оешмалары булмаган торак пунктларда «Иҗат юлы» район фестивале башланды. Район фестивалендә шәһәрнең барлык мәдәният учреждениеләре: «Энергетик» мәдәният йорты, балалар музыка мәктәбе, киноучреждение, үзәк китапханә, район мәдәният йорты, шәһәр мәдәният йорты, туган якны өйрәнү музее катнаша. Һәр мәдәният учреждениесе театральләштерелгән тамаша, традицион бәйрәм, халык күңел ачулары һәм башка тематик программа рәвешендә программа әзерли һәм шушы программасын авылларда яшәүчеләргә тәкъдим итә. 18 сентябрьдә "Энергетик" мәдәният сараеның иҗат коллективы Олы Батрас авылы халкы алдында чыгыш ясады. Фестиваль кысаларында барлыгы 16 авылга бару планлаштырыла.