Зәйдә чернобыльчеләрне искә алдылар

Бүген Зәйдә 32 ел элек Чернобыль атом-электр станциясенең дүртенче энергия блогында булган һәлакәт нәтиҗәләрен бетерүдә катнашкан зәйлеләрне искә алу чарасы үтте. Зәйдән әлеге фаҗига нәтиҗәләрен бетерүдә 100дән артык кеше катнашты. Бүгенге көндә шуларның 57се генә исән-имин. Озак еллар дәвамында чернобыльчеләрне искә алу Җиңү бульварындагы һәйкәл янында үтә. Бирегә бу юлы да Чернобыльне үз күзләре белән күргән ир-атлар, бүгенге көндә безнең арада булмаганнарның якыннары, иҗтимагый оешма вәкилләре җыелды. Арадан вакытсыз киткән чернобыльчеләр бер минут тынлык белән искә алынды. Алар истәлегенә куелган стелла кызыл канәферләргә күмелде. Искә алу тантанасы “Энергетик” мәдәният сараенда дәвам итте. Биредә анда катнашучыларга рәхмәт сүзләрен район башкарма комитеты җитәкчесе урынбасары П.А. Байрашев җиткерде. “Союз Чернобыль” иҗтимагый оешмасының Зәй бүлеге җитәкчесе Владимир Санин бүген чернобыльчеләрнең игътибар тоеп яшәүләрен билгеләп үтте. Искә алу тантанасы алар өчен махсус әзерләнгән концерт белән тәмамланды.