“Ачык хат көне”

Чираттагы «Ачык хат көне» узган җомгада «Энергетик» Мәдәният сараенда шәһәр үзәгендә яшәүчеләр белән үткәрелде. Биредә теләгән һәркем үзен борчыган сорауларны төрле бүлек белгечләренә, җитәкчеләргә, хезмәт күрсәтү оешмалары вәкилләренә шәхсән бирә алды. Киләчәктә үзләре яшәгән микрорайонны ничек күрергә теләүләре турында күзгә-күз карап фикер уртаклашты.

Җыелышны район башлыгы Татьяна Воропаева алып барды. Анда башкарма комитет җитәкчесе Рөстәм Сәлахетдинов, район башлыгы урынбасары Роберт Халитов, шәһәр Советы рәисе урынбасары Марсель Хуҗин, шәһәр башкарма комитеты җитәкчесе Сергей Максимов катнашты. Район башлыгы чыгышында агымдагы елда башкарылган эшләргә тукталды. Ул социаль-икътисади үсеш күрсәткечләрендә уңай динамика саклануын искәртте. Соңгы елларда районда эшсезләр санының 3 мәртәбә кимүе куанычлы. Җитештерелгән продукция күләме 15 миллиард 905 миллион сум тәшкил итә. Әлеге күрсәткеч буенча без республикада 6нчы урында. Бу, әлбәттә, эре предприятиеләрнең нәтиҗәле эшләве белән бәйле. Мәсәлән, ГРЭС җитештерү күләмен 1,1 тапкырга, "КАМАЗавтотехника" ҖЧШ - 127, "ТатЭК" ЯАҖ -130, тимер-бетон эшләнмәләр заводы - 105,7, кирпеч заводы - 109, "ТЕХНО" 111 процентка арттырган.

2010 елның җәе коры килүгә карамастан, авыл хуҗалыгында терлекләрнең баш санын саклап калуга ирешелгән. Быел республикада гамәлгә кергән гаилә фермалары төзү программасы кысаларында 18 гаилә фермасы эшли башлаган. Ел ахырына алар санын 26га җиткерү планлаштырыла.

Шулай ук торак төзелеше буенча да шактый эш башкарылды. "Тузган торак" программасы кысаларында Иске Зәй һәм Мирныйда ике йорт файдалануга тапшырылды. Әле дә Иске Зәйдә һәм Урсай, Бохарай авылларында күпфатирлы йортлар төзү бара. Социаль ипотека программасы буенча Яңа шәһәрнең Жуков урамында 7 "а" йортын төзү башланды. 65 фатирлы бу йорт 2012 елга әзер булыр дип планлаштырыла.

Юллар төзү, төзекләндерү эше дә җитди куелды. Социаль объектлар - тимер-юл вокзалы, музыка мәктәбе, социаль тернәкләндерү үзәге, үзәк дәваханәсенең авыруларны кабул итү һәм балалар бүлекләре төзекләндерелде. Авылларда соңгы ике елда 60 километрлап су челтәрләре яңартылды. Балалар бакчаларында күп эш эшләнде. Болар барысы да спонсорлар хисабына башкарылды.

Бу көннәрдә Дәүләт Советы депутаты Роберт Миннегалиев ярдәме белән белем йортларына чаңгылар кайтартылды. Шулай ук спонсорлар ярдәме белән балалар бакчалары йомшак инвентарьлар, урын-җир белән тәэмин ителә. Республика Президенты фәрманы белән 10 миллион сумга бакчаларга җиһазлар (шкаф, өстәл, урындык, кровать һ.б.) кайтарылачак.

- Алга таба да менә шулай тотрыклы яшәү өчен безгә тиздән булачак сайлауларда актив катнашып, яхшылап уйлап тавыш бирергә кирәк, - диде Татьяна Воропаева, халыкка мөрәҗәгать итеп.